ပိတ်ပင်ခံ စာအုပ်များ

ပြီးခဲ့တဲ့ စက်တင်ဘာလတုန်းက အမေရိကန်သမ္မတကတော် မယ်လာနီယာ ထရမ့်ပ်ဟာ Dr. Seuss ပုံပြင်စာအုပ်တွေကို အမေရိကန်ပြည်ထောင်စုတစ်လွှားက ကျောင်းတွေကို လှူဒါန်းခဲ့ပါတယ်။ ဒါပေမယ့် ကျောင်းတစ်ကျောင်းက သူမလှူဒါန်းတဲ့ ပုံပြင်စာအုပ်တွေကို လက်ခံဖို့ ငြင်းဆိုခဲ့တာနဲ့ ကြုံခဲ့ရပါတယ်။

အဲဒီကျောင်းက ပြန်စာမှာ ဖော်ပြထားတဲ့ အကြောင်းပြချက်ကတော့ Dr. Seuss ပုံပြင်စာအုပ်တွေမှာ “လူမျိုးရေးခွဲခြားမှုအကြောင်းအရာတွေ၊ ကယ်ရီကေးချား ရုပ်ပြောင်တွေနဲ့ အန္တရာယ်ရှိတယ်လို့ ယူဆရတဲ့ အကြောင်းအရာဖော်ပြချက်တွေ” ပါဝင်နေလို့ပါတဲ့။ ဒါဟာ Dr. Seuss စာအုပ်တွေအတွက် ပထမဆုံးအကြိမ် ပိတ်ပင်တားဆီးခံရတာတော့မဟုတ်ပါဘူး။ ဒါဟာ သမိုင်းတစ်လျှောက်မှာ ပိတ်ပင်တားဆီးခံခဲ့ရတဲ့ စာအုပ်ပေါင်းများစွာရဲ့ အဖြစ်အပျက်တွေထဲကမှ တစ်ခုသာဖြစ်ပါတယ်။

နာမည်ကျော် စာရေးဆရာ ရေး ဘရတ်ဒ်ဘူရီက “စာအုပ်ဆိုတာ ကျည်ဖြည့်ထားတဲ့ သေနတ်တစ်လက်ပဲ” လို့ သူ့ရဲ့ ခေတ်လွန်ဆန်းကျယ်ဝတ္ထုရှည် Fahrenheit 451 ထဲမှာ ထည့်ရေးခဲ့ဖူးပါတယ်။ ဒီစာအုပ်ဟာဆိုရင်လည်း အောင်မြင်မှုကြီးကြီးမားမားရခဲ့သလို အမေရိကန်နိုင်ငံ တစ်လွှားမှာ ကျောင်းသားမိဘတွေ ကျောင်းတွေနဲ့ အကြီးအကျယ် ထိပ်တိုက်ရင်ဆိုင်ခြင်းခံခဲ့ရပြီးတော့ အတော်ပွဲဆူစေခဲ့တဲ့ စာအုပ်ဖြစ်ခဲ့ပါတယ်။

ဒါကြောင့်လည်း “စာပေဟာ အသိဥာဏ်ကို မြင့်မားစေတယ်” ၊ “ပညာမြင့်မှ လူမျိုးတင့်မယ်” ဆိုတဲ့စကားတွေ ရှိပေမယ့် အကြောက်တရားအမျိုးမျိုးကြောင့် ကမ္ဘာပေါ်မှာ နိုင်ငံအလိုက် အကြောင်းပြချက်မျိုးစုံနဲ့ ပိတ်ပင်ခဲ့တဲ့စာအုပ်တွေ ရှိပါတယ်။ အတွေးအခေါ်အယူအဆမြင့်မားသွားမှာကို စိုးရိမ်တဲ့ အတွက် ပိတ်ပင်တာမျိုးရှိသလို ကိုယ်ကျင့်တရားပျက်ယွင်းစေတယ်၊ စိတ်ဓါတ်ကိုပြုပြင်ပြောင်းလဲစေတယ် ဆိုပြီး ပိတ်ပင်တာမျိုးလည်း ရှိပါတယ်။ အလိမ္မာစာမှာရှိတယ်ဆိုပေမယ့် အဆိပ်အတောက်ဖြစ်စေတဲ့ စာအုပ်တွေလည်း ရှိပါတယ်။

သမိုင်းတစ်လျှောက် နိုင်ငံအလိုက်စာအုပ်အမျိုးအမျိုးကို အယူအဆအမျိုးအမျိုးနဲ့ နှစ်ပေါင်းအတော်ကြာအောင် အပိတ်ပင်ခံခဲ့ပေမယ့် အထင်ရှားဆုံး ပိတ်ပင်ခံရတဲ့ စာအုပ်စာရင်းမှာတော့ သမ္မာကျမ်းစာက ထိပ်ဆုံးကပါပဲ။ သမ္မာကျမ်းစာ (The Bible) ကို စာအုပ်အနေနဲ့ ၁၄၄၀ မှ စတင်ထုတ်ဝေဖြစ်တာပါ။ သမိုင်းတစ်လျှောက် ကမ္ဘာပေါ်မှာ အရောင်းရဆုံး စာအုပ်လည်းဖြစ်တဲ့ ဒီစာအုပ်ကို အရင်ဆိုဗီယက်နိုင်ငံဟောင်း (USSR) က ၁၉၂၆ ခုနှစ်ကနေ ၁၉၅၆ ခုနှစ်အထိ နှစ်ပေါင်း ၃၀ ကြာအောင် ပိတ်ပင်ထားခဲ့ဖူးပါတယ်။ အီသီယိုးပီးယား (Ethiopia) နိုင်ငံမှာ ၁၉၈၆ ခုနှစ်က တားမြစ်ခြင်းခံခဲ့ပြီး ရေကြောင်းလမ်းကနေတစ်ဆင့် ဘုရားကျောင်းတွေကို ပို့လိုက်တဲ့ သမ္မာကျမ်းစာ အုပ်ရေ ၄၀၀၀၀ ကျော်ဟာ ထိန်းသိမ်းခြင်းခံခဲ့ရပါတယ်။

ဒါ့အပြင် ကားလ်မတ်နဲ့ ဖရိုင်းဒရစ်ခ်ျ အိန်ဂျယ်တို့ ရေးသားပြီး ၁၈၄၈ ခုနှစ်က ထုတ်ဝေခဲ့တဲ့ ကွန်မြူနစ်ကြေငြာစာတမ်း (The Communist Manifesto) စာအုပ်ကိုတော့ တူရကီနိုင်ငံမှာ ၁၈၄၈ ခုနှစ်ကနေ ၂၀၁၃ ခုနှစ်အထိ ၁၆၅ နှစ်ကြာအောင် ပိတ်ပင်ခဲ့ပါတယ်။ ကွန်မြူနစ်အတွေးအခေါ်တွေ ပျံ့နှံ့စေတယ်ဆိုတဲ့ အကြောင်းပြချက်နဲ့ပါ။

၁၉၀၃ ခုနှစ်မှာ ဂျက် လန်ဒန်ရေးသားခဲ့တဲ့ The Call of The Wild (အရိုင်းခေါ်သံ) စာအုပ်ကိုတော့ ဂျာမဏီမှာ နာဇီတို့ ကြီးစိုးခဲ့တဲ့ ၁၉၃၃ ခုနှစ်ကနေ ၁၉၄၅ ခုနှစ်အတွင်း ပိတ်ပင်ခဲ့ပါတယ်။ အကြောင်းရင်းကတော့ အစွန်းရောက် တယ်၊ တော်လှန်ချင်တဲ့စိတ်ကို အားပေးလို့ဆိုတဲ့ အကြောင်းပြချက်နဲ့ပါ။

နောက်ထပ် ပိတ်ပင်ခံရတဲ့ နာမည်ကျော် စာအုပ်က Ulysses ပါ။ Ulysses ဆိုတာက ရောမလို ခေါ်တာပါ။ အင်္ဂလိပ်လိုဆိုရင်တော့ Odysseus လို့ခေါ်ပြီး ဂရိဒဏ္ဍာရီလာ သူရဲကောင်းတစ်ဦးရဲ့ နာမည်ဖြစ်ပါတယ်။ ဒီစာအုပ်ကို ဂျိမ်းစ် ဂျွုက်စ်ရေးသားပြီး ၁၉၂၂ ခုနှစ်မှာ ထုတ်ဝေခဲ့မယ့် ဗြိတိသျှနိုင်ငံမှာတော့ လိင်အသားပေးလွန်းတယ်ဆိုတဲ့အကြောင်းပြချက်နဲ့ ၁၉၂၂ ခုနှစ်ကနေ ၁၉၃၀ ခုနှစ်အထိ ၈ နှစ်ကြာအောင် ပိတ်ပင်ခဲ့ပါတယ်။

ရက်ဒ်ကလစ်ဖ် ဟောလ်ရဲ့ The Well of Loneliness ကတော့ လိင်တူချစ်ကြိုက်မှုကို အသားပေးဖော်ပြထားတဲ့စာအုပ်လို့ နာမည်တပ်ခြင်းခံရပြီး အစောပိုင်းကာလတွေတုန်းက လိင်တူကိစ္စကို ပြင်းပြင်းထန်ထန်ကိုင်တွယ်ခဲ့တဲ့ ဗြိတိန်နိုင်ငံမှာ ၁၉၂၈ ခုနှစ်ကနေ ၁၉၄၉ ခုနှစ်အထိ ၂၁ နှစ်ကြာအောင် ပိတ်ပင်ခံခဲ့ရပါတယ်။ လိင်တူအခွင့်အရေး ကြိုးပမ်းမှုတွေပေါ်ပေါက်လာပြီးနောက်ပိုင်း ၁၉၄၉ ခုနှစ်မှာတော့ ပြန်လည်ထုတ်ဝေခွင့်ရခဲ့ပါတယ်။ သူနဲ့အတူပိတ်ပင်ခံခဲ့ရတဲ့ ဒီ၊ အိတ်ခ်ျ၊ လောရင့်စ်ရဲ့ Lady Chatterley’s Lover စာအုပ်ကတော့ The Well of Loneliness လောက်ကံ မကောင်းခဲ့ပဲ ၁၉၆၀ မှ ပြန်ထုတ်ဝေခွင့်ရခဲ့ပါတယ်။

Gone with the Wind ကို လေရူးသုန်သုန်ဆိုပြီး ဆရာမြသန်းတင့် ဘာသာပြန်ဆိုခဲ့ပြီးတော့ ကမ္ဘာမှာရော မြန်မာမှာပါ အကြီးအကျယ်အောင်မြင်ခဲ့ပါတယ်။ ဒီစာအုပ်ကို ဆရာမ မာဂရက် မစ်ချယ်က ၁၉၃၆ ခုနှစ်မှာ ရေးသားခဲ့တာပါ။ အဲဒီ ၁၉၃၆ ခုနှစ်မှာပဲ ကွန်မြူနစ်အုပ်ချုပ်မှုကို ထိခိုက်စေတယ်ဆိုတဲ့ အကြောင်းပြချက်နဲ့ ရုရှားနိုင်ငံက ပိတ်ပင်ခဲ့တာ ၂၀၀၁ ခုနှစ်ထိပါပဲ။ ၆၅ နှစ်တိတိကြာပါတယ်။

ဒီလိုပါပဲ ကွန်မြူနစ်အသိုင်းအဝိုင်းကို တုန်လှုပ်စေတဲ့ တခြားစာအုပ်တစ်အုပ်က ဂျော့ဂ်ျ အိုဝဲလ်ရဲ့ Animal Farm ဖြစ်ပါတယ်။ မြန်မာပြည်မှာတော့ ဒီစာအုပ်ကိုတော့ သခင်ဘသောင်းက ခြေလေးချောင်းတော်လှန်ရေးဆိုပြီး ဘာသာပြန်ဆိုဖူးပါတယ်။ ကွန်မြူနစ်စနစ်ကို သရော်တဲ့စာအုပ်ဖြစ်သလို အကျင့်ပျက်နေတဲ့ တိုင်းပြည်ခေါင်းဆောင်တွေကို လှောင်ပြောင်တဲ့ စာအုပ်လည်းဖြစ်ပါတယ်။ ကွန်မြူနစ်နိုင်ငံဖြစ်တဲ့ ကျူးဘားနဲ့ တရုတ်နိုင်ငံမှာ ၁၉၄၅ ခုနှစ်ကနေ ယနေ့အချိန်အထိ ပိတ်ပင်ထားဆဲဖြစ်ပါတယ်။ တရုတ်မှာ ဆင်ဆာဖြတ်တောက်ခြင်းခံထားရတဲ့ တရုတ်ဘာသာစကားနဲ့စာအုပ်ကိုတော့ အကန့်အသတ်တွေနဲ့ ထုတ်ဝေခွင့်ပြုထားပါတယ်။ အာဖရိကတိုက်က ကင်ညာနိုင်ငံမှာတော့ ၁၉၉၁ ခုနှစ်ကနေ ယနေ့အချိန်အထိ ပိတ်ပင်ထားပြီး စာအုပ်မှာပါဝင်တဲ့ စာသားနဲ့ပုံတွေက အစ္စလမ်မစ်စံနှုန်းတွေနဲ့ ကိုက်ညီမှုမရှိဘူးဆိုပြီး ယူအေအီးနိုင်ငံကလည်း ၂၀၀၂ ခုနှစ်ကနေ အခုအချိန်အထိ် ပိတ်ပင်ထားပါတယ်။ ရုရှားနိုင်ငံမှာတော့ ၁၉၄၃ ခုနှစ်ကနေ ၁၉၈၀ ခုနှစ်အထိ ၃၇ နှစ်ကြာအောင်ပိတ်ပင်ခံခဲ့ရပါတယ်။

ပိတ်ပင်ခံရတဲ့ ဂျော့ဂ်ျ အိုဝဲလ်ရဲ့ စာအုပ်က ဒီတစ်အုပ်တည်းတင်မဟုတ်ပါဘူး။ Nineteen Eighty-Four ဟာဆိုရင်လည်း ဆိုဗီယက်ခေါင်းဆောင် စတာလင်ရဲ့ခေါင်းဆောင်မှုအပေါ် လှောင်ပြောင်ထားတဲ့ စာအုပ်ပါ။ ဒါကြောင့်မို့လို့ ဆိုဗီယက်ယူနီယံမှာ ၁၉၅၀ ခုနှစ်ကနေ ၁၉၉၀ ခုနှစ်အထိ နှစ်ပေါင်း ၄၀ ကျော်ကြာ အောင် ပိတ်ပင်ခံခဲ့ရတဲ့အပြင် ကျူဘားဒုံးပျံအရေးအခင်းဖြစ်ခဲ့တဲ့ ၁၉၆၀ ကာလပတ်ဝန်းကျင်မှာလည်း UK နဲ့ အမေရိကန်တို့မှာ ပိတ်ပင်ခံခဲ့ရပါတယ်။

၁၉၈၈ ခုနှစ်မှာထုတ်ဝေခဲ့တဲ့ ဆဲလ်မန် ရက်ရ်ှဒီးရဲ့ The Satanic Verses စာအုပ်ကတော့ ဘာသာရေးအငြင်းပွားဖွယ်ရာ အရေးအသားတွေကြောင့် နိုင်ငံအများအပြားမှာ ပိတ်ပင်ခံရတဲ့စာအုပ်ပါ။ အိန္ဒိယ၊ ဘင်္ဂလားဒေ့ရှ်၊ ဆူဒန်၊ တောင်အာဖရိက နဲ့ သီရိလင်္ကာတို့မှာ ၁၉၈၈ ခုနှစ်ကနေ အခုအချိန်ထိပိတ်ပင်ထားသလို အခြားနိုင်ငံပေါင်း ၁၆ နိုင်ငံမှာလည်း ၁၉၈၉ ခုနှစ်ကနေ ယနေ့အချိန်ထိ ပိတ်ပင်ထားပါတယ်။ ဒီစာအုပ်နည်းတူ ဘာသာရေးအသိုင်းအဝိုင်းနဲ့ ထိပ်တိုက် တွေ့ခဲ့တဲ့ စာအုပ်တစ်အုပ်က ဒန် ဘရောင်းရဲ့ The Da Vinci Code ဖြစ်ပါတယ်။ ဒန် ဘရောင်းရဲ့ ဝတ္ထုဟာ ခရစ်တော်ဇာတ်တော်စဉ်ကို ပြောင်းပြန်လှန်ပြခဲ့တဲ့ဇာတ်လမ်းဖြစ်ပြီးတော့ မူရင်းဝတ္ထုအပြင် ရုပ်ရှင်ရိုက်ကူးခဲ့တဲ့နေရာမှာလည်း အကြီးအကျယ် အောင်မြင်မှုရခဲ့ပါတယ်။ ဒါပေမယ့် ကက်သလစ်ဘာသာရေးအယူအဆနဲ့ ခရစ်ယာန်သမိုင်းအပေါ် ကြီးကြီးမားမား ထိခိုက်မှုရှိတယ်လို့ ယူဆခြင်းခံရတာကြောင့် ၂၀၀၄ ခုနှစ်ကတည်းက လက်ဘနွန်နိုင်ငံက ထုတ်ဝေခွင့်ပိတ်ပင်ထားတာ ယနေ့အချိန်အထိပါပဲ။ ဒါ့အပြင် ကက်သလစ်ဘာသာရေးအသိုင်းအဝိုင်းနဲ့ ခုချိန်ထိ အငြင်းပွားနေရဆဲစာအုပ်လည်း ဖြစ်ပါတယ်။

လူငယ်တွေအကြားအောင်မြင်မှုကြီးကြီးမားမားရခဲ့တဲ့ ဂျေ၊ ကေ၊ ရိုးလင်းရဲ့ Harry Potter ဝတ္ထုစီးရီးနဲ့ အီး၊ အယ်၊ ဂျိမ်းစ်ရဲ့ Fifty Shades of Grey ဝတ္ထုတွေဟာလည်း ခေတ်သစ်စာပေလောကမှာ အငြင်းပွားဖွယ်တွေနဲ့ ပိတ်ပင်ကန့်သတ်ခံခဲ့ရတဲ့ စာအုပ်တွေဖြစ်ပါတယ်။

အထက်မှာဖော်ပြခဲ့တဲ့ စာအုပ်တွေလိုပဲ ကမ္ဘာပေါ်မှာ အစိုးရတွေ တိုင်းပြည်တွေ ဘာသာတရားတွေ ကျောင်းတွေ စာကြည့်တိုက်တွေရဲ့ တားဆီးပ်ိတ်ပင်ခြင်းကိုခံခဲ့ရတဲ့ စာအုပ်ပေါင်းမြောက်များစွာ ရှိနေခဲ့ ရှိနေဆဲပါ။ ၁၉၈၂ ခုနှစ်မှာဆိုရင် အမေရိကန်ပြည်ထောင်စု တစ်လွှားမှာ စာအုပ်ပေါင်းမြောက်များစွာ ပိတ်ပင်ခြင်းခံခဲ့ရတာကြောင့် Banned Books Week ဆိုတဲ့ စာအုပ်ပိတ်ပင်မှု ကန့်ကွက်ရေး ရက်သတ္တပတ်လှုပ်ရှားမှုမျိုးတွေတောင် ပြုလုပ်ကြတဲ့အထိပါပဲ။

တကယ်တမ်းအားဖြင့် ပိတ်ပင်ခြင်းခံရတဲ့ စာအုပ်အများစုဟာ ပုဂ္ဂိုလ်ရေးအမြင်ရှုထောင့်တွေကြောင့် လိုတာထက်ပိုပြီး အန္တရာယ်ရှိတယ်လို့ ရှုမြင်ခြင်းခံရတာဖြစ်တယ်လို့ ပညာရှင်တွေကပြောပါတယ်။ ဥပမာ ဟယ်ရီ ပေါ်တာလို စာအုပ်မျိုးတွေဟာ ဆန္ဒပြကန့်ကွက် ပိတ်ပင်ခြင်းခံရစရာအကြောင်းမရှိပါဘူး။ ဒါပေမယ့် ကျောင်းတော်ကို ဆန့်ကျင်တဲ့ အယူဝါဒတွေကို ဖြန့်ချိတယ်လို့ ခေါင်းစဉ်တပ်ခံရပြီး ကက်သလစ်နိုင်ငံတစ်ချို့မှာ တားမြစ်ခြင်းခံခဲ့ရပါတယ်။

စာအုပ်တွေ စာပေတွေကို တားမြစ်ပိတ်ပင်တာဟာ လူတွေရဲ့ သိပိုင်ခွင့်ကို တားဆီးလိုက်တာဖြစ်ပါတယ်။ စာအုပ်တွေရဲ့ ဖော်ပြချက်တွေအပေါ် လွတ်လပ်စွာသဘောထားကွဲလွဲနိုင်ခွင့်ရှိပေမယ့် ပိတ်ပင်တားဆီးတာကတော့ မှန်ကန်တဲ့ တုန့်ပြန်ပုံမဟုတ်ပါဘူး။ ခြင့်ချိန်ရှုမြင်နိုင်မယ့် မျှခြေကို ပယ်ဖျက်လိုက်တဲ့ သဘောမျိုးသာဖြစ်ပါတယ်။ မြန်မာနိုင်ငံမှာလည်း ယခင်စာပေစိစစ်ရေးခေတ်တုန်းက ထုတ်ဝေခွင့်မရခဲ့တဲ့ ပြင်ဆင်တည်းဖြတ်ခံလိုက်ရတဲ့ စာအုပ်ပေါင်းမြောက်များစွာ ရှိခဲ့ဖူးပါတယ်။ ဒီလို ပိတ်ပင်မှုတွေကြောင့် လူတွေရဲ့ ချင့်ချိန်စဉ်းစားနိုင်စွမ်းကို ကန့်သတ်သလိုသာဖြစ်ခဲ့ပြီးတော့ ဘယ်သူ့အတွက်မှ အကျိုးမရှိခဲ့ပါဘူး။

သမိုင်းတစ်လျှောက်ပိတ်ပင်ခံခဲ့ရတဲ့ စာအုပ်တွေဟာဆိုရင်လည်း ပိတ်ပင်ထားစဉ်ကာလတွေမှာ ခိုးဝှက်ထုတ်ဝေခဲ့ကြသလို အများစုဟာ ခုကာလမှာ တရားဝင် ပြန်လည်ထုတ်ဝေခွင့်ရနေပြီဖြစ်ပါတယ်။ အဲဒီစာအုပ်တွေဟာ သက်ဆိုင်ရာနေရာဒေသနယ်ပယ်တွေမှာ ပြန်လည်ထုတ်ဝေခွင့်ရတဲ့အခါ အောင်မြင်မှုတွေ ပိုပိုပြီးရရှိခဲ့ကြပါတယ်။ ဒီအချက်က စာပေဟာ တားဆီးလို့ရကောင်းတဲ့အရာ မဟုတ်ဘူးဆိုတာကို ညွှန်းဆိုနေပါတယ်။ တနည်းပြောရရင် ဒီအချက်ကိုက စာပေရဲ့ အံ့ဘနန်းအစွမ်းတစ်မယ်လည်း ဖြစ်ပါတော့တယ်။

Monywa Gazette

#Books #Banned #History