မိမိရဲ့ လူမှုကွန်ယက်အကောင့်တွေ လုံခြုံစိတ်ချရစေဖို့ ဆိုရင်
- မောင်မိုးဇွန်
- Nov 30, 2017
- 3 min read
ဒီနေ့ခေတ်မှာတော့ စမတ်ဖုန်း၊ အင်တာနက်နဲ့ လူမှုကွန်ယက်ဝက်ဘ်ဆိုက်တွေဟာ လူတိုင်းနီးပါးနဲ့ ခွဲခြားလို့မရလောက်အောင်ကို နီးစပ်ဆက်နွယ်နေတဲ့အရာတွေ ဖြစ်လာပါတယ်။ ကမ္ဘာ့လူဦးရေရဲ့ ၃ ပုံ ၂ ပုံလောက်ဟာ မိုဘိုင်းဖုန်းတွေ အသုံးပြုနေသလို လူတစ်ယောက်ဟာ ပျမ်းမျှတစ်နေ့ကို ၄ နာရီလောက် အင်တာနက် အသုံးပြုဖြစ်နေတယ်လို့လည်း စစ်တမ်းတွေက ဆိုကြပါတယ်။
မြန်မာပြည်မှာလည်း မိုဘိုင်းဆက်သွယ်ရေးစနစ်တွေ တိုးတက်လာတာကြောင့် မိုဘိုင်းဖုန်းအသုံးပြုသူ အရေအတွက် အလျှင်အမြန်တိုးတက်လာနေသလို အင်တာနက်နဲ့ လူမှုကွန်ယက်အသုံးပြုမှုနှုန်းကလည်း ထပ်ချပ်မကွာ လိုက်ပါတိုးတက်လာနေပါတယ်။ စာရင်းတွေအရဆိုရင် ပြည်တွင်း အင်တာနက်အသုံးပြုသူအရေအတွက်က ၂၅-၃၀ သန်း လောက်အထိရှိနေပြီးတော့ ဒီပမာဏရဲ့ ၉၀% လောက်ကလည်း အင်တာနက် အသုံးပြုနေကြတယ်လို့ ဆိုပါတယ်။
အထူးသဖြင့်တော့ Facebook ၊ Instagram ၊ Viber ၊ Wechat စတဲ့ လူမှုကွန်ယက်နဲ့ Social Messaging App တွေဟာ လူသုံးအများဆုံးပါပဲ။ တချို့များဆိုရင် Facebook ကိုတောင် အင်တာနက်လို့ ထင်မြင်ယူဆနေတုန်းပါ။ ဒီလို လူမှုကွန်ယက်အသုံးပြုမှုပမာဏ တဟုန်ထိုး မြင့်တက်လာတာကြောင့် မြန်မာနိုင်ငံလို အခြေခံအားဖြင့် နည်းပညာဗဟုသုတ ကျယ်ကျယ်ပြန့်ပြန့်မရှိသေးတဲ့ နိုင်ငံမျိုးမှာ ဘေးထွက်ဆိုးကျိုးတွေ ထွက်ပေါ်လာပါတယ်။ အသုံးပြုသူတွေအနေနဲ့ အခြေခံလိုက်နာသင့်တဲ့ စည်းမျဉ်းတွေ နည်းပညာ လုံခြုံရေးအသိသုတတွေ မရှိတာကြောင့်လည်း ထိမ်းသိမ်းကိုင်တွယ်ရ ခက်ခဲလာပါတယ်။
လူမှုကွန်ယက်ဆိုတာကလည်း တစ်ချို့တွေအတွက်တော့ ဓာတ်ပုံတွေတင် ၊ လူတစ်ဦးချင်းစီရဲ့ ခံစားချက်တွေ မျှဝေ ၊ အသိပညာတွေ၊ သတင်းအချက်အလက်တွေ ဖြန့်ဖြူးရာနေရာဖြစ်ပေမယ့် တချို့သောသူတွေအတွက်တော့ ဒီလိုမဟုတ်ပြန်ပါဘူး။ တစ်ချို့သော လူပုဂ္ဂိုလ်တွေအနေနဲ့ လူမှုကွန်ယက်ကို လွဲမှားစွာအသုံးချတာတွေ ပိုမိုတိုးပွားလာနေပြီးတော့ သတင်းမှားတွေ ဖြန့်ချိခြင်းတာ၊ အမုန်းစကားနဲ့ ညစ်ညမ်းလိင်မှုဆိုင်ရာ အကြောင်းအရာတွေ ဖြန့်ချိတာနဲ့ တစ်ပါးသူရဲ့ ပုဂ္ဂိုလ်ရေးလွတ်လပ်မှုနဲ့ လုံခြုံမှုကို ထိပါးတာတွေပါ ပြုမူလာကြပါတယ်။
လူတစ်ဦးချင်းစီရဲ့ တွေးခေါ်ပုံနဲ့ အသုံးချပုံကို ကန့်သတ်ဖို့ကတော့ မဖြစ်နိုင်တာကြောင့် သတင်းမှားတွေ ဖြန့်ချိခြင်းတာ၊ အမုန်းစကားနဲ့ ညစ်ညမ်းလိင်မှုဆိုင်ရာ အကြောင်းအရာတွေကို ကုန်စင်အောင် တားဆည်းဖို့တော့ မလွယ်ကူလှပါဘူး။ ဒီပြဿနာတွေအတွက်ကတော့ မိမိ အသိစိတ်နဲ့ မိမိ စောင့်စည်းထိန်းချုပ် ချင့်ချိန် အသုံးပြုတာက အသင့်တော်ဆုံးနည်းလမ်းပါပဲ။
ဒီပြဿနာတွေအတွက်ကတော့ မြန်မာပြည်မှာ လူသုံးများတဲ့ Facebook အတွက်ဆိုရင် Facebook Community Standards လို စည်းကမ်းချက်တွေကို ဖတ်ရှုလေ့လာလိုက်နာတာက အသင့်တော်ဆုံးပါပဲ။
ဒီနှစ်ပိုင်းထဲမှာ ဖြစ်ပွားမှုများလာနေတဲ့ ပုဂ္ဂိုလ်ရေးလွတ်လပ်မှုနဲ့ လုံခြုံမှုကို ထိပါးတာတဲ့ အပြုအမူမျိုးတွေ (တနည်း) အရပ်သုံးအခေါ် အကောင့် Hack တာတွေအတွက်ကတော့ ကိုယ်တိုင်ကာကွယ်နိုင်မယ့် နည်းလမ်းတွေ ရှိပါတယ်။
ပုဂ္ဂိုလ်ရေး၊ ဘာသာရေး၊ လူမျိုးရေး၊ ငွေကြေး၊ ဂုဏ်သိက္ခာ၊ ပျော်ရွှင်လိုမှု စတဲ့ အကြောင်းပြချက်အမျိုးမျိုးကြောင့် ဒီနေ့ခေတ် လူမှုကွန်ယက်အသုံးပြုသူတွေအကြားမှာ အကောင့်ဟက်ခံရတာမျိုးတွေ အဖြစ်ပိုပို စိတ်လာနေပေမယ့် ယျေဘုယျအားဖြင့် အသုံးပြုသူ ကိုယ်တိုင်ပေါ့လျော့မှုကနေ Hack ချင်သူတွေအတွက် အခွင့်အရေးရသွားတာမျိုးက အများဆုံးဖြစ်လေ့ရှိတဲ့ ကိစ္စဖြစ်ပါတယ်။ ဒါကြောင့် ဒီအချက်ကို အလေးထားပြင်ဆင်ပြီး ကြိုတင်တားဆီးထားနိုင်ရင် ဒီဘေးရန်ကနေ အများကြီး ကာကွယ်နိုင်ပါလိမ့်မယ်။
အကြမ်းဖျဉ်းပြောရမယ်ဆိုရင် ဒီနေ့ခေတ်မှာ အင်တာနက် ဝက်ဘ်ဆိုက်တွေ၊ Moblie Banking စနစ်တွေနဲ့ လူမှုကွန်ယက် Account တွေ အားလုံးဟာ လုံခြုံရေးအတွက် Password စနစ် တစ်မျိုးမျိုးကို ကာကွယ် ချိတ်ဆက် အသုံးပြုထားလေ့ရှိပါတယ်။ Password တွေဟာ သုံးစွဲသူတွေရဲ့ ဘဏ္ဍာရေးအချက်အလက်၊ အကြွေးဝယ်ကတ် အချက်အလက်နဲ့ ကိုယ်ရေး အချက်အလက်တွေကို ကာကွယ်ပေးနိုင်တဲ့ ခံစစ်အုတ်တံတိုင်းကြီးပါပဲ။ ဒီလို Password တွေ အသုံးပြုပြီး ကာကွယ်ထားကြတယ်ဆိုပေမယ့်လည်း လူတစ်ဦးချင်းစီရဲ့ အမှုမဲ့ အမှတ်မဲ့ ပေါ့လျော့မှုသေးသေးလေးတွေကြောင့် Password ကျိုးပေါက်မှုတွေ မကြာခဏဖြစ်ပေါ်နေပါတယ်။ Hacker တွေပြောနေကြစကားလေးကတော့ “Password တိုင်းဟာ ချိုးဖျက်လို့ရတယ်” ဆိုတာပါပဲ။
လူမှုကွန်ယက်နဲ့ အင်တာနက်အသုံးပြုသူတွေအနေနဲ့ အွန်လိုင်းအသုံးပြုတဲ့အခါမှာ အန္တရာယ်ရှိတဲ့ အပြုအမူတွေနဲ့ လက်မခံနိုင်လောက်တဲ့ အမှားအယွင်းတွေကို ပြုလုပ်မိနေတယ်ဆိုရင် အခုအချိန်ကစပြီး ရပ်ဆိုင်းသင့်ပြီလို့ပဲ ဆိုရပါတော့မယ်။ လူမှုကွန်ယက်အသုံးပြုသူတွေရဲ့ ကိုယ်ရေးအချက်အလက်တွေနဲ့ Account တွေကို ကာကွယ်ဖို့ အောက် ဖော်ပြပါ အချက် ၆ ချက်ကို အခြေပြုပြီး ပြန်လည်သုံးသပ်ပြင်ဆင်သင့်ပါတယ်။
(၁) လုံခြုံမှုမရှိတဲ့ Password ကို မရွေးပါနဲ့
လူအများက password တွေကို မမေ့အောင် ခပ်လွယ်လွယ် နဲ့ မှတ်ရလွယ်တဲ့ စာသားမျိုးတွေ၊ မိမိနဲ့ ပတ်သတ်တဲ့ နေ့စွဲမျိုးတွေနဲ့ ဖန်တီးထားလေ့ရှိပါတယ်။ အချို့တွေဆိုရင် “123456” နဲ့ “password” တို့လိုမျိုး အလွန်လွယ်ကူလွန်းတဲ့ Password မျိုးတွေကိုတောင် အသုံးပြုနေကြပါတယ်။ မိမိရဲ့ ကိုယ်ရေးအချက်အလက်တွေနဲ့ လူမှုကွန်ယက် Account တွေကို စိတ်ချလက်ချ အသုံးပြုချင်တယ်ဆိုရင် ခန့်မှန်းရလွယ်ကူတဲ့ password တွေကို ရှောင်ကျဉ်ရမှာဖြစ်ပြီးတော့ (ဖြစ်နိုင်ရင်) စာလုံးရေ ၁၂ လုံးထက် ရှည်ပြီး အက္ခရာ၊ နံပါတ်နဲ့ အခြားသင်္ကေတတွေပါ ပါဝင်တဲ့ password မျိုးကို ဖန်တီးပြီး ရွေးချယ်အသုံးပြုသင့်ပါတယ်။ ပြီးရင် ပုံမှန်အနေနဲ့ ၆ လ တစ်ကြိမ်လောက် Password ကို ပြောင်းလဲ အသုံးပြုနေဖို့လည်း လိုအပ်ပါတယ်။
(၂) Two-factor authentication သုံးပါ
အခုနောက်ပိုင်း Facebook အပါအဝင် နာမည်ကျော် လူမှုကွန်ယက်တွေ၊ Mobile Banking စနစ်တွေနဲ့ အင်တာနက် ဝက်ဘ်ဆိုက်တွေဟာ ၎င်းတိုရဲ့ Login စနစ်မှာ two-factor authentication စနစ် ထည့်သွင်း အသုံးပြုလာပါတယ်။ ဒီစနစ်က Login ဝင်ရောက်ချိန်မှာ Password မှန်ကန်ရုံနဲ့ Account ထဲကို ဝင်ရောက်ခွင့်မပြုပဲ မိမိဖုန်းဆီကို Code နံပါတ်ပေးပို့ပြီး အဲဒီ Code နံပါတ်မှန်ကန်အောင် ဖြည့်နိုင်မှ Account ထဲကို ဝင်ရောက်ခွင့်ပြုတဲ့ စနစ်တစ်မျိုးပါ။ ဒီနည်းလမ်းကို အချို့က အလုပ်ရှုပ်တယ်လို့ ယူဆပြီး အသုံးမပြုကြပါဘူး။ ဒါပေမယ့် ဒီနည်းလမ်းဟာ စိတ်ချရတဲ့ ကာကွယ်ရေးစနစ်တစ်ခုဖြစ်ပြီးတော့ မိမိ Account ကို တစ်စုံတစ်ယောက်က ဝင်ဖို့ ကြိုးစားနေရင်လည်း အလွယ်တကူ သိနိုင်မှာဖြစ်ပါတယ်။
(၃) Account အမျိုးမျိုးအတွက် မတူညီတဲ့ password တွေ သတ်မှတ် အသုံးပြုပါ
ကျွန်တော်တို့ဟာ ဝက်ဘ်ဆိုက်အများအပြားအပြင် လူမှုကွန်ယက် account တစ်ခုတွေရော Email စနစ်တွေပါ အများအပြား အသုံးပြုနေတာဖြစ်တာကြောင့် Account တစ်ခုစီတိုင်းမှာ Password တစ်ခုစီ သတ်မှတ်ထားကြပါတယ်။ ဒါပေမယ့် မှတ်ရလွယ်အောင် အကောင့်အားလုံးကို Password တစ်ခုတည်းသာ ဖန်တီးပြီး အသုံးပြုကြတဲ့ သူတွေလည်း မနည်းပါဘူး။ ဒါဟာ အွန်လိုင်းအသုံးပြုရာမှာ အလွန်မှားယွင်းတဲ့ အကျင့်တစ်ခုဖြစ်ပါတယ်။ ဒီလိုပြုလုပ်ခြင်းကြောင့် မိမိရဲ့ Password ကို ဟက်ကာတွေ ရရှိသွားရင် အခြားအရေးကြီး account တွေပါ အကုန်ဆုံးရှုံးရမှာဖြစ်ပါတယ်။
(၄) Password ကို မဝေမျှပါနဲ့
လက်ရှိ ကမ္ဘာပေါ်က အင်တာနက်နဲ့ စမတ်ဖုန်းအသုံးပြုသူ ၃၁ ရာခိုင်နှုန်းဟာ သူတို့ရဲ့ Password တွေကို အခြားသူတွေနဲ့ အကန့်အသတ်မရှိ မျှဝေထားကြပါတယ်။ အများစုကတော့ ချစ်သူရည်းစား၊ အိမ်ထောင်ဖက်နဲ့ မိသားစုဝင်တွေဆီကိုပါ။ အမေရိကန်ပြည်ထောင်စုက လူဦးရေ သုံးပုံတစ်ပုံလောက်ကလည်း Online Account password တွေကနေစပြီး ဘဏ် account Password တွေအထိ တခြားသူတွေနဲ့ မျှဝေထားကြတာတွေ့ရပါတယ်။ မြန်မာပြည်မှာလည်း နာမည်ကျော် အနုပညာရှင်တွေရဲ့ အကောင့်တွေ မကြာခဏ Hack ခံနေရတာဟာ ဒီအချက်ပေါ်မှ အခြေတည်မယ်လို့ ယူဆရပါတယ်။ Account ကို Security မြှင့်ပေးမယ်ဆိုပြီး Password လိမ်ယူသွားတာမျိုးတွေ ဖြစ်ပွားခဲ့ဖူးပါတယ်။ ဒါကြောင့် မည်သည့်အကြောင်းပြချက်နဲ့မဆို Password မျှဝေတာဟာ အန္တရာယ်များတဲ့ အပြုအမူတစ်ခုဖြစ်တယ်လို့ အွန်လိုင်းလုံခြုံရေးပညာရှင်တွေက သတ်မှတ်ထားကြပါတယ်။
(၅) Software ကို အမြဲတစေ update ပြုလုပ်ပါ
ဖုန်း OS တွေ၊ ဆော့ဖ်ဝဲလ်တွေနဲ့ ကွန်ပျူတာ ပရိုဂရမ်တွေဟာ မကြာခဏ update Version တွေ ပြုလုပ်ပေးနေပါတယ်။ Update တိုင်းမှာ လုံခြုံရေးစနစ်ကို အဆင့်မြှင့်တင်မှုတွေ မကြာခဏ ထည်သွင်းပေးထားတတ်တာမို့ အမြဲတစေ Update ပြုလုပ်နေဖို့လိုပါတယ်။ တစ်ချို့သော အသုံးပြုသူတွေက ငွေကြေးကုန်ကျမှာကို နှမျောတာကြောင့် Update ပြုလုပ်ဖို့ ဝန်လေးတတ်ကြပါတယ်။ အသစ်အသစ်သော Virus တွေ နေ့စဉ်နဲ့အမျှပေါ်ထွက်လာနေတာကြောင့် Update ပုံမှန်မလုပ်တာက အန္တရာယ်များတဲ့ အလေ့အထတစ်ခုဖြစ်ပါတယ်။
(၆) Public Wi-Fi ကွန်ယက်တွေကို သတိထား အသုံးပြုပါ
လူတိုင်းဟာ အခမဲ့ရရှိတဲ့ Public Wifi တွေကို အသုံးပြုရတာကို သဘောကျကျပါတယ်။ သုံးစွဲသူတွေဟာ ကော်ဖီဆိုင်၊ စားသောက်ဆိုင်တွေ၊ အများပြည်သူနဲ့ သက်ဆိုင်တဲ့ သက်ဆိုင်တဲ့နေရာတွေနဲ့ လေဆိပ်တွေမှာရှိတဲ့ Public Wifi ကွန်ရက်တွေကနေတဆင့် လူမှုကွန်ယက် ဝက်ဘ်ဆိုက်တွေ သုံးတာ၊ Email တွေ စစ်ဆေးတာ၊ အင်တာနက်သုံးတာ၊ ဈေးဝယ်တာတွေကို ပြုလုပ်တတ်ကြပါတယ်။ ဒါပေမဲ့ ဒီ Wifi ကွန်ရက်တွေဟာ လုံခြုံရေးအားနည်းတာကြောင့် ကွန်ယက်အသုံးပြုနေသူအချင်းချင်းရဲ့ အချက်အလက်တွေကို ချိုးဖောက်ဝင်ရောက်ပြီး ခိုးယူလို့ရပါတယ်။ ဒါကြောင့် Public Wi-Fi ကို သုံးတော့မယ်ဆိုရင် ချိတ်ဆက်မှုကို လုံခြုံမှုရှိစေဖို့ encrypt လုပ်ပေးမယ့် virtual private network (VPN) တစ်ခုကို ဖန်တီး အသုံးပြုတာက အကောင်းဆုံးပါပဲ။
ဒါ့အပြင် အကောင့်တွေကို စိတ်ချရပြီး ပုံမှန်အသုံးပြုနေတဲ့ Email အကောင့်နဲ့သာ ဖွင့်သင့်ပြီးတော့ ကွန်ပြူတာနဲ့အသုံးပြုမယ်ဆိုရင် အသုံးမပြုတော့ချိန်မှာ အကောင့်တွေကို ပိတ်ထားဖို့လဲ မမေ့သင့်ပါဘူး။ ဒီလိုအချက်တွေနဲ့ ကိုက်ညှိပြီးတဲ့အခါ မိမိအနေနဲ့ မိမိရဲ့ အွန်လိုင်းလူမှုကွန်ယက်အကောင့်တွေနဲ့ ပတ်သက်ပြီး ဘယ်လိုအားနည်းချက်တွေ ပြုမူနေမိတယ် ၊ ဘာတွေပြင်ဆင်ဖို့လိုနေတယ်ဆိုတာတွေကို သိမြင်လာပါလိမ့်မယ်။
တကယ်တမ်းအားဖြင့် လူမှုကွန်ယက်ဟာ ဘဝမဟုတ်ပေမယ့် လူတွေအတွက် အခြားမျက်နှာစာတစ်ခုသဖွယ်ဖြစ်လာနေပြီလို့ How the World Changed Social Media ဆိုတဲ့ စာအုပ်ထဲမှာ ဖွင့်ဆိုဖော်ပြထားပါတယ်။ ဒါကြောင့်လဲ မိမိတို့ရဲ့ လူမှုကွန်ယက်အကောင့်တွေကို ဘယ်လိုလုံခြုံအောင် ထိန်းသိမ်းရမယ်ဆိုတာကို သိထားနိုင်တာဟာ မိမိတို့ရဲ့ တခြားတပါးသောမျက်နှာစာကို တင့်တယ်လှပလုံခြုံအောင် ကာကွယ်ထိန်းသိမ်းထားနိုင်တာပဲဖြစ်တာကြောင့် အသုံးပြုရတာကလည်း ကျေနပ်ပျော်ရွှင်စရာဖြစ်နေပါလိမ့်မယ်။
Mobile Guide / Vol.4_Issue 31
29 Nov 2017
Comments